Mei ersts Date
I bin eiso irgendwann ins Netz und hob mi a wengal umgschaud, wos si do a so rumtreibt ..i war auf da Suche noch an liabn Madl, und im Internet gibt’s ganz schee vui !!
I hob a boid oane kanna gleand, de war ziemlich nett und mia ham vui gschriem, wia des hoid a so is
Irgendwann is dann da Dog kemma, do hobe mi dann traut, und hobs gfragd, oma uns amoi treffa..
I war ma ja ned sicha, obs zua sogd, weil sie is ja a Frau und man liest ja immer wieda wia
gfährlich dass des is, wenn ma si im Internet verabredet – oba, hobe ma dengt …frong kost ja nix
Sie war a glei einverstandn, …i war direkt a wenig erstaunt – oba ok Tschico, hobe ma denkt –des ziagsd jez durch.
Und wia mia a so redn wo ma uns treffa, sogd sie auf oamoi, sie sammld mi im vorbeifohrn
vo da Straß auf
I war total perplex – hob ausm Reflex „ok“ gsagd ..und aufglegd
….Mei, hobe ma denkt –
Wiaso wui sie de ned in an öffentlichn Lokal mid mia treffa?
Und warum lassd mi de, an Fremdn, in ihr Auto eisteign?
Wo wui de hi mid mia?
Sie hod wos gsagd vo an See!!
Do is mia hoaß und koid an Buckl owe glofa – K.O. – Tropfa war ja no des harmloseste, wos ma eigfoin is wos ma ois lesd und hört – Mord wega 5 Euro - oda wenns wieda oan üba Internet in a Foin glockt ham und umbrocht !!
I hob nimma gwissd wosse macha soid – a Ausred is ma koane eigfoin, und dasse mi ned trau wuide a ned zuagem
Und dea Dog is oiwe näher kemma
Ok, hobe ma dengd, wennsd scho sterbn muass Tschico, nacha soins es wenigstns erwischn, de Verbrecha de
Eiso hobe mi hi ghockt und an Zettl gschriem, mit da Community, wo`s o-gmeld is, dem Nick vo dera Frau ..oda Mo, wer woaß obs übahaupt a Frau is!!!
Und nachad hobe no ihr Handynumma dazuagschriem, den Zettl sauba zamm glegt und in mein Schreibtisch ganz obn hi glegt – weil wenns so weit is und mei Schreibtisch ausgrammd werd, nachad hänns gfunna, den Zettl – und de guada Frau eigsperrt !!
i glab i war kasweiß , wia i in des Auto eigstiegn bin – unda guada Undahoida ware a ned – de erstn 20 min..
Oba dann war`s a klasse Date – und den Zettl hobe wegschmeissn kinna
Wünsch eich olle an scheena Dog ..und a no vui aufregende Dates – oba im anderen Sinne